Sare amen sijam e devleskere ćhave
O Rroma valjanol te na gndinen kaj naje on da manusha numa valjani te len o shaipa so den pe olenge, e o rromnja pla buchaja te djan po anglal.
Junakinja taro amaro vakeripe tani 33 bershengi Maja Jovanovich taro Deronje koja ple sikavipaja, sikljovipaja peravela sa o predrasude kola, amen shaj te phena kaj isi numa naje, po but taro amende isi amen premao Rroma. Po but droma nagradimi, ki Amari phuv thaj ko avrijalutne phuvja bashi pli literarno buti, sikavni, asistenti zhurnalisti, egzampli tari suksesno terni djuvli koja premalo plo phenipe ko vakti lilja ki godi kaj o sikljovipe jekhutno ikljovipe taro chororipe.
– Sa so ovol palo so sikljoven avol po hari, thaj po buderi. Sebepi taro odova phenav basho javera da Rroma ten a ovol olen gndipe kaj naje tane manusha thaj te len shaipe so dol pe olenge. But menjindjape thaj o Rroma da valjani te menjinen plo gndipe, majanglal taro ple ćhave. Ako den olen podikeripe thaj den olen ko drom e sikljovipasko ka phraven olenge udar taro po shukar djivdipe, phenol I Maja Jovanovich thaj phenol kaj o Rroma maj anglal o Rromnja valjani te dikhena e sikavne djuvljen thaj te len plo djivdipe kop le vasta.
Jovanovich phenol kaj ko odova drom podikeripe tari familija but importantno.
Ako I familija podikerol tumen ano okova so kerena dji ko suksesi po kolaj avena. Isima bah kaj sijum ko okola manusha pali kaste beshol I familija. Sebepi odole podikeripaske avdive bashi mande shaj te phenav kaj sijum suksesno ko but bucha. Kerava buti ko than tari sikavni ko Deronje ki Fundoni sikavni “Vuk Karadjich”, ani koja me da geljum kana sijumaj tikni, ramosarav gijlja, a po anglal sijumaj spikeri ko lokalno radio thaj televitija thaj ćlani taro Komunako veche tari komuna Odjaci, phenela Jovanovich, a em but mangola kana kerola buti e ćhavenacr thaj kana ramosarol poezija.
-Ki Fundoni sikavni ko Deronje, beshipasko than komuna Odjaci, kerava 8 bersh buti sar pedagoshko asistenti thaj sikavutno tari rromani ćhib. Sikavdjum 9 generacije taro rromane sikavutne, prekalo sikavdipe arakhavaj olengere garavde talentija thaj potencijalija. Ćhivav olen ko sikavno sistemi thaj azhutinavaj te oven “dikhle” basho amalipe djandipaja kaj on odova zasluzhinen. Em bari nagrada sine kana shunenaj so phenav olenge thaj lundjarena te sikljoven, phenela Jovanovich.
Ko vakeribe e Majaja Jovanovich tema koja nashti nakha olakoro literarno buti. Sar oj phenol ramosardipaja startuindja spontano, uzaro azhutipe taro dad o Rajko, ko magpie te sokavi so oj osetinol.
-Ani mli poezija dominacija isi mangipaske note thaj na rodimi rromani dusha. Mle gijlja ćhivde ko antologije “Rromnja, pesnikinje tari Srbija” thaj “ Rromani poezija ki anglutni Jugoslavija”, ikljilje ko nekobor zbornikija taro mashkarthemutne pesnichko konkursija. Liljum nagrade ko but festivalija thaj konkursija taro okola ko komune dji o mashkarthemutne. Agorutne tane okola taro na dur odikerdo 61. Sajmi taro pustika ko Beogradi ano kova ko okviri taro konkursi “Sare amen sijam e devleske ćhave” lilja dujto nagrada bashi gili”Agorutni stanica” phenela I Maja Jovnovich thaj phenol basho sa o rromnja te ple buchaja aven dji kop lo phenipe.
Rromnja sar o djuvlja taro javer nacioniteti shaj te menjinen o amalipe ano kova djivdinen. Valjani samo te oslobodinen pe taro bute bershengo kompleksi kaj naje manusha thaj olengere garavde potencijalija te aven dji ko phenipe ko em shukar shaipe phendja basho “Nashe Novine” Maja Jovanovich.
Naše novine
