Lokalno akciono plano basho vakti taro 2016.dji o 2020.bersh ko jek krlo e Nacionake strategijaja bashi integracija e Rromengi.

Naje bari diferenca ko svako divesko djivdipe taro rromano amalipe ki komuna Odžaci taro avera kko po but thana ki Srbija. Beshipaske thana, sastipasko arakhipa, sikljovipa, buti… em ki akaja komuna taro Zapadnobačko okrugp, ano kova ko agorutno ramosardipe taro 2014.bersh djivdinena 1.035 manusha taro rromano amalipe, em phare problemija. Okova so sebepi akaja lokalno samouprava taro akava foro shaj te phenol pe kaj egzampli tari shukar praksa kana o Rroma ko puchipe, so oj o problemija kola tane evidentirime anol so po sig ko reso.

Importantno djajpe anglal ki odoja rig ulo ko 2008.bersh kana phravdili Kancelarija basho rromane puchipa, jek taro anglune ki Srbija, so odova sebepi ko nakhle ofto bersh realizuindjepe but importantne
projektija. Kerdjape jek kotor tari komunalno infrastruktura thaj legalizacija taro rromano beshipasko than ko Deronje, dji ko 100 kupatilija ki teritorija tari sa e komuna, sikljovipe, finansijako podikeripe basho talentuime chave thaj studentija, kinibe taro pustika, akava samojek kotor taro programi tari Kancelarija basho Rroma ko Odžaci.

– E Rromengere problemije ko komuna Odžaci jek tane kolonecar so dikhena pe hem avera Rroma ki Srbija. Sa odola problemija, kola avdive isi olen „anav“ pendžardi e lokalno samouprava,sekretarijati tari pokrajina thaj e rashtrake institucije-phendja koordinatori tari Kancelarija basho Rroma Andrija Djurich, kote panda phenol kaj bizo azhutipe taro foro, reso taro rromane problemija nashti ovol.

–Buti tari Kancelarija basho rromane puchipa te sikavi o problemija thaj te kerol projektija kola ka bichavi ko amare thaj fondija tari EU koja dol thajra  premalo projektno dokumentija. Dji kaj avera lokalne samouprave phenena kaj ka azhutinen e rromenge te ovol olenge po shukar, ki komuna Odžaci odoja buti lerol pe prekalo konkretno projektija. E lokalno samouprava tani spremno te podikerol ko finansije e buti tari Kancelarija thaj sar reso ola isi seriozno reso taro rromane problemija. Ko chachipe, naje odoborom sigate sar bi mangenaj o Rroma, numa nashti „prekali rat“ te reshinen pe problemija kola purane po but taro 100 bersh. Numa okova soj importantno e „rota“ iranol pe thaj amen sijam odola kola na valjann te mukha te achol-phenola o Djurich.

Chachipe kaj o djivdipe e rromengo ki komuna Odžaci naje jek taro than ko than kote beshena, sar so phenol o Djurich sine premalo olengoro mangipa kana kerdjape o LAP.

Roma ki komuna Odžaci em but djivdinena ko Bogojevo, Deronje thaj Odžaci. Ko Deronje thaj Odžaci, kote o Rroma integrišime e gadjenca, ko Bogojevo on hem avdive djivdinena ko ulavdo thaj na shukar beshipasko than. Odova da sine sebepi so chivdjape akcenat ko LAP bashi integracija e rromengi ko vakti septembar 2016-2020 bersh, kova tano premali Nacionaki strategija, chivdjape ki oblast taro beshipaske thana. Premalo odova, kerol pe buti ki Strategija te odola manusha rasellinen pe thaj te kinen pe khera ko gava basho 40 rromane fammilije. Realizacijaja taro akava projekti kote o foro ka sufinansirinol 15% ka ovol shaiše bashi po sig integracija e rromengi taro Bogojevo – phendja o Djurich.

Ako o akcenti ko LAP ko beshipaske thana, sar phenol o Djurich, kerol pe buti ko oblast taro sikljovipe, sastipasko arakhipe, khuvipe ki buti…

Zorakerol o chachipe kaj so po but gendo taro terne Rroma dikhena kozom importantno o sikljovipe.  Djanaja kaj o afirmativne mere ko sikljovipe valjanol te oven koristime, soske on tane odola kola ka anen reso hem ko avera problemija. Sebepi taro odova ki Kancelarija insistirinol pe ko sikljovipe prekalo savena edukacije thaj konkursija…, kola ko beshipaske thana Deronje thaj Odžaci dindje shukar reso. Shukar so sa po but gendo taro terne Rroma iranena pe ko sikljovipe thaj naje tane ko mangipe samo diplomaja tari fundoni sikavni. Sebepi taro odova, avdive ki komuna Odžaci isi amen Rroma mashkarune thaj fakultetsko sikljovipaja thaj djandipaja-phendja basho „ Nashe novine“ koordinatori tari Kancelarija basho rromane puchipa, Andrija Djurich.