Ki Srbija isi 593 telostandardno beshipaske thana, ano kola djivdinena o Rroma. But hari kerol pe buti ki urbanizacija taro odola beshipaske thana, thaj adjahar o predrasude, stereotipija tha diskriminacija kerdile ko dikhipe taro rromane beshipaske thana.

Kana ko puchipe o foro Nish, deipe taro saja ki infrastruktura ko rromane beshipaske thana ko palune 10 bersh naje, a sebepi so odola thana naje legalizuime. Beograd mahala, Stochni trg thaj Crvena Zvezda tane trine m bare beshipaske thana ano kola djivdinola akava em baro minoriteti ko Nishi, premali statistika ano Nishi djivdinena 8 milje Rroma,numa na oficialno isi trin droma po but rroma ko Nishi.

“Naje amen struja, kanalizacija, pani, but amenge phare. O Chave jek ćhon tekvash na djana ki sikavni”, phenol I Mevla Chupi taro beshipasko than Crvena Zvezda.

Premalo phenipa taro angluno manush taro foro Nish, rajo Darko Bulatovich, o foro ko chon septembar 2016.bersh bichaldja concept nota, ko konkurs kote dolape saja tari IPA 2013, kova kerol 9,5 milionija evrija, te bi shaj kerolaj pe trajno kherengo shaipe thaj po shukar infrastruktura ko telostandardne rromane beshipaske thana ko teritorije taro komune ki Republika Srbija.

Na oficijalno vakerol pe kaj planiniripe te keren pe 52 khera ano kola ka beshen o Rroma, ako akava projekti podikerol pe taro donatori.

Jek taro em baro problem kleja dikhena pe o Rroma ko Nishi tane o Rroma ko beshipasko than Crvena Zvezda, ov tano phanlo e legalizacijaja taro odova beshipasko than. Em ako ov egzistirini panda taro 1960 bersh, akava beshipasko than nashti ovol legalizuimo. Nashti ovol soske o khera tane ko amalikano than thaj ko aver kotor ki privatni phuv. Ko palune 40 dive akale manushen naje struja, problem tano sar phene taro EPS Snabdevanje ko Nishi borchi taro 30 milionija dinarija. Akava problem sine em anglal o duj bersh thaj akala manusha sine bizi struja 6 chon. Sherutno tari distribucija ko odova vakti, akanutno sherutno tro foro Nish palo lungo vakeripe, ko oktobri 2014.bersheste, sine ko akava beshipasko than, thaj anglal o medije phendja kaj jek kotor taro borchi pokimo, a o manusha taro akava beshipasko than te ko chon pokinen 100-110 milje dinarija, ko rachuni tari distribucija. Palo duj bersh  jek problemi, numa aver sherutnno tari Distribucija, rajo Sasha Kordich, kova phenol kaj naje struja sebepi taro baro borchi! Anglal o jek kurko odikerdilo protesti, kova na dindja nisavo reso!

“ Valjani li te nakhol panda 6 chon tea kala manusha ovol olen struja, em ako o sherutne taro akava beshipasko than djananen kaj odothe djivdinena 700 manusha, isi 80 chave kola djana ki sikavni, baro gendo taro purane mausha? Mangol li te phenol pe kaj o Rroma mukhle ko odova te lencar te khelen pe o lokalne politicharija”, puchela pe o rajo Sulejman Sulejmanovich.

Odova tano odova. Sebepi so svako manush kova ikerol o zort taha shaj te avel ko akava beshipasko than thaj te phenol-akaja phuv tani e foroski, akate ka kera aver diso, a tumen morate selinen tumen. Akaja buti ko nesave forija hem ovela, ko nakhle bersha.

Basho reso taro akava problem valjani politikano mangipa thaj hari manushikanipe, bashi koja pachav kaj panda isi amen.

Hakaj tari legalizacija taro rromane beshipaske thana

Panda ko djakeripe

Ko agorutne 15 bersh e Srbija sine ola 4 Hakaja tari legalizacija, numa nijek na dikhlja e problematika taro beshipaske thana ano kola djivdinena o Rroma, urbanizacija tani jek taro shaipa te ovol po shukar e rromenge.

Sebepi tari SKRUG-Liga Roma, e rashtra ko septembri 2015 bersheste ljilja “prezenti”, kova panda na ljilja oficialno hem ako lafi taro dokumenti kova dol realno thaj optimalno reso taro jek kompleksno problemi. Lafi taro Anglo Hakaj tari legalizacija taro rromane beshipaske thana ki Srbija. Sar phenol Osman Balich, sherutno taro YUROM centar thaj prezidento tari Liga Roma akava hakaj valjani te kerol shaipe te o khera kola kerde dji o 1971 bersh ano kola djivdinena po but taro 100 Rroma, oven legalizuime.

Ko okviri taro projekti „Ovde smo zajedno– Evropska podrška za inkluziju Roma“ Misija taro OEBS ki Srbija kerdja thaj dindja sar “prezenti” baza taro podatkija e rshtrake. Ani olate isi sa snimime sa so valjani o bucha basho beshipaske thana e rromenge, numa ko lokali ni na kerol pe lafi taro odova. Akaja baza valjani te ovol basho avutne investicijake planija ko poshukaripe tari rromani populacija.

Roma world